"Paxtakor"ning iste’dodli futbolchilaridan biri bo‘lgan Muhammadali O‘rinboyevga Maksim Shaskix ikkinchi davrada ko‘proq o‘yin amaliyotini berishni boshladi. "Qizilqum"ga qarshi o‘yindan keyin uning fikri quyidagicha bo‘ldi:

"Birinchi navbatda chiroyli g‘alaba bilan muxlislarni tabriklayman. Bugun muhim uch ochkoni ko‘lga kiritdik va so‘nggi tur oldidan o‘z vazifamizni yanada osonlashtirdik, raqiblarimiz ham ochko yo‘qotibdi. Maqsadimiz chempionlik va biz bunga erisha olamiz".

- Maksim Shaskix jamoani ancha yoshartirdi, ikkinchi bo‘limda yoshlar o‘yin amaliyotiga ega bo‘lish uchun imkoniyat bermoqda.

- Murabbiy yoshlarga va shaxsan menga berayotgan o‘yin amaliyoti uchun minnatdorman. Bu yosh futbolchilarga o‘zini ko‘rsatish uchun yaxshi imkoniyat. Hozir bu imkoniyatlardan foydalanib, tajribali o‘yinchilar bilan maydonda harakat qilishim menga katta tajriba bermoqda.

- Chempionlikka erishish uchun yana bitta qadam qoldi. "Bunyodkor" bilan bo‘lib o‘tadigan uchrashuv haqida oldindan nima deya olasiz?

- So‘nggi turda chempionlik masalasi hal bo‘ladi, o‘yinga yaxshi tayyorlanishimiz zarur. Bellashuv oson kechmaydi va biz mehmon sifatida o‘ynaymiz. Ijobiy natijaga erishib, oldimizga qo‘yilgan maqsadga erishamiz va chempionlikni qo‘lga kiritamiz degan umiddaman!" - dedi O‘rinboyev.