Iordaniyadagi boks bo‘yicha Osiyo chempionatida bugun ayollar o‘rtasidagi yarim final janglari o‘tkazilmoqda. 66 kg. vazndagi o‘zbekistonlik sportchi Navbahor Hamidova hindistonlik Ankushita Boroga qarshi ringga ko‘tarildi.

Birinchi raund tengma-teng kurashlar ostida o‘tgan bo‘lsa-da, hakamlarning barchasi ustunlikni hind bokschisiga berishdi.

Ikkinchi bo‘limda Hamidova tajovuzkorlik va zarbalarining aniqligini oshirdi. Natijada bu raundda 4 referi Navbahorning ustunligini e’tirof etishdi. Shuning uchun jang g‘olibi so‘nggi 3 daqiqalikda aniqlanadigan bo‘ldi.

Uchinchi raundda bokschilar borlarini berib harakat qilishdi. Zarbalar soni bo‘yicha o‘zbek qizi ustunlikka erishdi va jang taqdirini o‘z foydasiga hal qildi — 4:1 (28:29, 29:28, 29:28, 29:28, 29:28).

Navbahor Hamidova Osiyo chempionati finaliga chiqqan o‘zbekistonlik ilk sportchiga aylandi.