Iordaniyada o‘tkazilayotgan boks bo‘yicha Osiyo chempionatida bugun erkaklar o‘rtasida yarim final janglari doirasida O‘zbekiston erkaklar terma jamoasi 3 mag‘lubiyatdan keyin dastlabki g‘alabani qo‘lga kiritdi.

75 kilo vazndagi sportchimiz Saidjamshid Ja’farov hindistonlik Sumitga qarshi ishonchli jang o‘tkazdi. Birinchi bo‘limda bir hakam hind bokschisining ustunligini e’tirof etgan bo‘lsa, 4 hakam ustunlik Saidjamshidga berdi.

Hamyurtimiz ikkinchi va uchinchi raundlarda to‘liq ustunlikka erishdi va hakamlarning barcha ovozlarini o‘ziniki qilib oldi.

Yakuniy hisob — 5:0 (30:27, 30:27, 30:27, 30:27, 29:28). Shu tariqa, o‘zbekistonlik erkak bokschilar o‘rtasida Saidjamshid Ja’farov birinchi bo‘lib final yo‘llanmasini qo‘lga kiritdi.