Krishtianu Ronaldu "MYU"dan ketganidan bir necha soat o‘tib, bu klubga bog‘liq yana bir xabar matbuotda paydo bo‘ldi. Unda "Manchester Yunayted" egasi bo‘lgan Gleyzerlar oilasi klubni sotuvga qo‘ygani aytiladi. Amerikalik xo‘jayinlar klub uchun "eng maqbul xaridor" izlay boshladi. Bir necha yillik tinimsiz namoyishlardan keyin, "MYU" sotiladigan bo‘ldi. Ayrim ma’lumotlarga qaraganda, "MYU"ning narxi 9 milliard funtgacha baholanishi mumkin. Quyida "qizil iblislar" uchun ehtimoliy xaridorlar nomlari keltirib o‘tiladi.
Ser Jim Retkliff
Buyuk Britaniyaning eng boy odami sanalmish, Jim Retkliffning 15 milliard funt atrofida boyligi borligi aytiladi. U hozirda Fransiyaning "Nissa", Shveysariyaning "Lozanna-Sport" kabi jamoalariga egalik qilib kelmoqda. Retkliff "Chelsi"ni sotib olishga ham qiziqish bildirgandi. Yozda esa "MYU"ga xaridor bo‘lgan. Hozir bu jamoa sotuvga qo‘yildi va bu 70 yoshli milliarder uchun yaxshi imkoniyatdir.
Ilon Mask
AQSHdan "MYU" uchun qiziqishlar bo‘lishi turgan gap. Potensial nomzodlardan biri esa "Twitter" egasi Ilon Maskdir. "Forbes" nashri bergan xabarda aytilishicha, Maskning boyligi 154 milliard funtga teng. 51 yoshli sayyoramizning eng boy kishisi, bir paytlar "Twitter"da "Men ham "MYU"ni sotib olyapman" deya post qoldirgandi. Ajab emas, bu gap haqiqatga aylansa.
Muhsin Bayrak
Muhsin Bayrak Turkiyaning eng ko‘zga ko‘ringan kishisi. Uning boyligi esa 8 milliard funtga teng. U 2022 yil boshida "Chelsi"ni sotib olishga qiziqa boshlagandi. Hatto, Roman Abramovich u bilan muzokaralar o‘tkazish maqsadida Turkiyaga borgan. Ammo Bayrakning ayni damdagi butun boyligi "MYU"ni sotib olishga yetmaydi. Bu ishni amalga oshirish uchun unga yana 1 milliard kerak bo‘ladi.
Konor Makgregor
Makgregorning o‘zi unchalik ham milliarder inson emas. Ammo u "MYU"ni konsorsium a’zosi sifatida sotib olishda ishtirok etsa bo‘ladi. U avvalroq "Chelsi" xaridiga ham qiziqishlar bildirgan. Aslini olganda, UFC yulduzi "Liverpul" muxlisidir. Uning jamoasi ham sotuvga qo‘yilgan.
Maykl Nayton
Nayton "Manchester Yunayted"ning sobiq sport direktori sanaladi. 71 yoshli insonning Makgregor kabi unchalik ham pul ko‘p emas. Ammo konsorsium a’zosi sifatida savdoda ishtirok etishi mumkin. Knayton 1989 yilda "MYU"ni 20 million funtga sotib olishga harakat qilgan. Ammo eplay olmagandi. O‘shanda bu narx tarixdagi eng qimmati sifatida e’tirof etilgan.
ISMATOV J.
