Криштиану Роналду "МЮ"дан кетганидан бир неча соат ўтиб, бу клубга боғлиқ яна бир хабар матбуотда пайдо бўлди. Унда "Манчестер Юнайтед" эгаси бўлган Глейзерлар оиласи клубни сотувга қўйгани айтилади. Америкалик хўжайинлар клуб учун "энг мақбул харидор" излай бошлади. Бир неча йиллик тинимсиз намойишлардан кейин, "МЮ" сотиладиган бўлди. Айрим маълумотларга қараганда, "МЮ"нинг нархи 9 миллиард фунтгача баҳоланиши мумкин. Қуйида "қизил иблислар" учун эҳтимолий харидорлар номлари келтириб ўтилади.
Сер Жим Рэтклифф
Буюк Британиянинг энг бой одами саналмиш, Жим Рэтклиффнинг 15 миллиард фунт атрофида бойлиги борлиги айтилади. У ҳозирда Франциянинг "Ницца", Швейцариянинг "Лозанна-Спорт" каби жамоаларига эгалик қилиб келмоқда. Рэтклифф "Челси"ни сотиб олишга ҳам қизиқиш билдирганди. Ёзда эса "МЮ"га харидор бўлган. Ҳозир бу жамоа сотувга қўйилди ва бу 70 ёшли миллиардер учун яхши имкониятдир.
Илон Маск
АҚШдан "МЮ" учун қизиқишлар бўлиши турган гап. Потенциал номзодлардан бири эса "Twitter" эгаси Илон Маскдир. "Forbes" нашри берган хабарда айтилишича, Маскнинг бойлиги 154 миллиард фунтга тенг. 51 ёшли сайёрамизнинг энг бой кишиси, бир пайтлар "Twitter"да "Мен ҳам "МЮ"ни сотиб оляпман" дея пост қолдирганди. Ажаб эмас, бу гап ҳақиқатга айланса.
Муҳсин Байрак
Муҳсин Байрак Туркиянинг энг кўзга кўринган кишиси. Унинг бойлиги эса 8 миллиард фунтга тенг. У 2022 йил бошида "Челси"ни сотиб олишга қизиқа бошлаганди. Ҳатто, Роман Абрамович у билан музокаралар ўтказиш мақсадида Туркияга борган. Аммо Байракнинг айни дамдаги бутун бойлиги "МЮ"ни сотиб олишга етмайди. Бу ишни амалга ошириш учун унга яна 1 миллиард керак бўлади.
Конор Макгрегор
Макгрегорнинг ўзи унчалик ҳам миллиардер инсон эмас. Аммо у "МЮ"ни консорциум аъзоси сифатида сотиб олишда иштирок этса бўлади. У аввалроқ "Челси" харидига ҳам қизиқишлар билдирган. Аслини олганда, UFC юлдузи "Ливерпуль" мухлисидир. Унинг жамоаси ҳам сотувга қўйилган.
Майкл Найтон
Найтон "Манчестер Юнайтед"нинг собиқ спорт директори саналади. 71 ёшли инсоннинг Макгрегор каби унчалик ҳам пул кўп эмас. Аммо консорциум аъзоси сифатида савдода иштирок этиши мумкин. Кнайтон 1989 йилда "МЮ"ни 20 миллион фунтга сотиб олишга ҳаракат қилган. Аммо эплай олмаганди. Ўшанда бу нарх тарихдаги энг қиммати сифатида эътироф этилган.
ИСМАТОВ Ж.
