«Yuventus» rahbariyati klub direktorlar kengashi, jumladan prezident Andrea Anyelli va vise-prezident Pavel Nedvedning iste’foga chiqqanini e’lon qildi.
«Direktorlar kengashi a’zolari hal etilmagan huquqiy, texnik va buxgalteriya masalalarining markaziyligi va dolzarbligini hisobga olishdi. «Yuventus»ga ushbu muammolarni hal qilish uchun yangi direktorlar kengashini tayinlash kompaniya manfaatlariga mos deb hisoblandi.
Shu munosabat bilan, Andrea Anyellining taklifiga binoan va tarkibni yangilash to‘g‘risidagi qarorni iloji boricha tezroq Aksiyadorlar yig‘ilishiga taqdim etish uchun barcha direktorlar kengashi a’zolari iste’foga chiqishi kerak, — deyiladi klub saytidagi bayonotda.
Shuningdek, direktorlar kengashi Maurisio Arrivabenedan «Yuventus» bosh direktori lavozimini saqlab qolishni so‘ragani qayd etilgan.
Eslatib o‘tamiz, Andrea Anyelli «Yuventus» prezidenti lavozimini 2010 yilda boshlagan edi.