Portugaliya terma jamoasi va “Atletiko” hujumchisi Joau Feliks faoliyatini “Manchester Yunayted”da davom ettirishi mumkin, deb xabar bermoqda The Times.

Nashrning yozishicha, portugaliyalik hujumchi uchun kurashda “qizil iblislar” yetakchilik qilmoqda. "Yunayted" yozda Feliksga qiziqish bildirgan va hatto agent Xorxe Mendes bilan uchrashuv o‘tkazgan, biroq rad javobi berilgan edi. Futbolchining agenti “Atletiko” futbolchini hech qanday bahona bilan sotish niyatida emasligini aytdi.

Ayni damda vaziyat o‘zgardi, 23 yoshli futbolchi Madrid klubining asosiy tarkibdagi o‘rnini yo‘qotdi va "matraschilar" bosh murabbiyi Diyego Simeone bilan yomon munosabatda. Ispaniya matbuoti "Atletiko" rahbarlari yanvar oyida Joauni sotib olish bo‘yicha boshqa klublarning takliflarini tinglashga tayyorligini xabar qilishdi.

Joriy mavsumda Feliks Madrid klubi safida Ispaniya chempionatida 12 ta o‘yinda maydonga tushib, 3 ta gol urdi va 3 ta golli uzatmani amalga oshirdi. Transfermarkt portaliga ko‘ra futbolchining narxi 50 million yevroga baholanmoqda.