Португалия терма жамоаси ва “Атлетико” ҳужумчиси Жоау Феликс фаолиятини “Манчестер Юнайтед”да давом эттириши мумкин, деб хабар бермоқда The Times.

Нашрнинг ёзишича, португалиялик ҳужумчи учун курашда “қизил иблислар” етакчилик қилмоқда. "Юнайтед" ёзда Феликсга қизиқиш билдирган ва ҳатто агент Хорхе Мендес билан учрашув ўтказган, бироқ рад жавоби берилган эди. Футболчининг агенти “Атлетико” футболчини ҳеч қандай баҳона билан сотиш ниятида эмаслигини айтди.

Айни дамда вазият ўзгарди, 23 ёшли футболчи Мадрид клубининг асосий таркибдаги ўрнини йўқотди ва "матрасчилар" бош мураббийи Диего Симеоне билан ёмон муносабатда. Испания матбуоти "Атлетико" раҳбарлари январь ойида Жоауни сотиб олиш бўйича бошқа клубларнинг таклифларини тинглашга тайёрлигини хабар қилишди.

Жорий мавсумда Феликс Мадрид клуби сафида Испания чемпионатида 12 та ўйинда майдонга тушиб, 3 та гол урди ва 3 та голли узатмани амалга оширди. Transfermarkt порталига кўра футболчининг нархи 50 миллион еврога баҳоланмоқда.