JCH-2022 bosh kashfiyoti - Marokash milliy jamoasi Qatardagi o‘yinlari bilan butun arab dunyosiga bayram ulashayotgani ayni haqiqat.
Axir tarixda biror arab mamlakati hali yarim final yuzini ko‘rgan emasdi. Shu ma’noda aytsak, marokashliklar bugun nafaqat Afrika, balki arablar olamining bosh qahramonlari, albatta.
Bunday sehrli sensasiya me’mori - Volid Regragi. JCH-2022 startiga atigi 3 oy qolgan payt tajribali Vohid Xalilxojich o‘rnini egallagan mahalliy mutaxassis chindan ham, sehrgarlarga xos natija qayd etmoqda. Diqqat qiling, Marokash milliy jamoasi yangi bosh murabbiy qo‘l ostida 9ta o‘yin o‘tkazdi va hali biror marta mag‘lubiyatga uchragani yo‘q. Regragining jamoadagi statistikasiga qarang:
9ta o‘yin
7ta g‘alaba
2ta durang
Qolaversa, jamoa shu o‘yinlarda atigi 1ta gol qo‘yib yubordi (shu ham avtogol). Ha, futbolda chuqur himoya bilan ham katta shov-shuvlarni yuzaga keltirish mumkin. Bunga Marokash termasining hozirgi natijalari yaqqol isbot.
So‘z
- Yashirmayman, maksimal natijani ko‘zlayapmiz. Ha, jamoa sardori jarohatlandi, lekin bizda har bir futbolchi kurashmoqda. O‘yindan avval yigitlarga Afrika tarixini yozishimiz kerakligini aytgandim. Buni uddaladik. Kuchli jihatlarimizga asoslanib, oldinga bordik. Qaytaraman, missiyamizni hali tugatmadik. Faqat bir narsaga tushunmayapman, bizni qanaqasiga tanqid qilishlari mumkin? Axir qo‘limizdan kelganicha o‘ynaymiz, mavjud qurollarimizdan foydalanamiz... Volid Regragi (Marokash - Portugaliya o‘yinidan keyin).
