Madridning “Real” klubi yarim himoyachisi Toni Kroosning fikricha, jahon chempionati yarim finali doirasidagi o‘yinda bosh hakam Daniele Orsato Xorvatiya darvozasiga haqqoniy penalti belgilagan.

"Menimcha, hakam Xorvatiya terma jamoasiga penaltini to‘g‘ri belgiladi. Bu noto‘g‘ri qaror bo‘ldi deb o‘ylamayman", - dedi Kroos Real Total bilan suhbatda.

Eslatib o‘tamiz, o‘yindan so‘ng Xorvatiya terma jamoasining ba’zi futbolchilari, jumladan sardori Luka Modrich ham hakamni penalti belgilagani uchun tanqid qilgandi. Ularning fikricha, ushbu epizod oldidan Orsato xorvatlar foydasiga burchak to‘pini belgilashi kerak edi.

Argentina terma jamoasi 13 dekabr kuni Xorvatiyani 3:0 hisobida mag‘lub etib, jahon chempionati finaliga chiqdi.