“Navbahor”ning yakunlangan mavsumda qayd etgan statistik natijalari bilan tanishtirishda davom etamiz.

O‘zingizga ma’lum, ortda qolgan mavsumda “Navbahor” Coca Cola Superligasida 26 ta o‘yin o‘tkazib, 15 ta g‘alaba, 8 ta durang va 3 ta mag‘lubiyatni qayd etgan holda, raqiblar darvozasiga 33 ta gol urib, o‘z darvozasidan 15 ta to‘p o‘tkazib yuborib, yakunda 53 ochko to‘pladi hamda 2-o‘rinni egallab, kumush medalni qo‘lga kiritdi.

Ta’kidlash joizki, “Navbahor” Superliganing barcha jamoalaridan ochko olishga muvaffaq bo‘ldi. Yana shuni ham qayd etish lozimki, “Navbahor” o‘tgan mavsumda Coca Cola Superligasida o‘z darvozasidan eng kam to‘p o‘tkazgan himoyasi eng mustahkam jamoa bo‘ldi.

Xo‘sh, Samvel Babayan shogirdlari Namangan va safardagi uchrashuvlarda qanday natijalarni qayd etishdi?

Jamoa Coca Cola Superliga - 2022da  o‘z maydonida o‘tkazilgan 13 ta bahsning 7 tasida g‘alaba qozonib, 5 ta durang va 1 ta mag‘lubiyatni qayd etib, raqiblar darvozasiga 17 ta gol urgan holda, o‘z darvozasidan 6 ta to‘p olib chiqdi hamda 26 ochko to‘pladi.

Qizig‘i, “lochinlar” safardagi bellashuvlarda biroz yaxshiroq natijaga erishganlar.

“Navbahor” safardagi 13 ta uchrashuvning 8 tasida zafar quchib, 3 ta durang hamda 2 mag‘lubiyatni qayd etgan holda, raqiblar darvozasiga 16 ta gol urgan holda, o‘z darvozasidan 9 ta to‘p olib chiqdi va 27 ochko jamg‘ardi.  

Mazkur o‘yinlarda qayd etilgan natijalar yakunda jamoamizga o‘z tarixida ilk marta vise-chempionlik unvoni hamda Osiyo Chempionlar Ligasi (OCHL) yo‘llanmasini keltirdi.

“Navbahor” PFK matbuot xizmati.