"Bolonya" rasmiy sayti sobiq bosh murabbiy Sinisha Mixaylovichning vafoti tufayli o‘yin bekor qilinganini e’lon qildi.
17 dekabr kuni "Bolonya" Sloveniyaning "Gorisa" klubiga qarshi o‘rtoqlik o‘yinini o‘tkazishi kerak edi, biroq Italiya klubi rahbariyati va murabbiylar shtabi o‘yinni bekor qilishga qaror qildi. Uchrashuv o‘rniga jamoa futbolchilari yopiq eshiklar ortida mashg‘ulot o‘tkazishadi.
2022 yilning bahorida serbiyalik murabbiy leykemiyaning qaytalanishi haqida xabar bergan edi. Mixaylovich yana kasalxonada edi. Aprel oyida "Bolonya" bosh murabbiyi kasalxona bo‘limidan jamoaga ko‘rsatmalar berib, kasallikni yengib o‘tishga va’da bergandi.
Sinisha Mixaylovich futbolchi sifatida "Borovo", "Voyvodina", "Srvena Zvezda", "Roma", "Sampdoriya", "Lasio" va "Inter" klublarida o‘ynagan.
Sinisha Mixaylovich 2008 yildan 2009 yilgacha va 2019 yildan 2022 yilgacha "Bolonya"ga ustozlik qilgan. Shuningdek, "Inter", "Kataniya", "Fiorentina", "Sampdoriya", "Milan", "Torino", "Sporting" klublarida ishlagan. 2012 yildan 2013 yilgacha Serbiya terma jamoasini boshqargan.
