Krishtianu Ronaldu "Manchester Yunayted"dan ketgach, o‘ziga boshqa klub qidirmoqda. Portugaliyalik yulduzning "MYU"dan ketishiga Pirs Morgan bilan uyushtirgan "bomba" intervyusi sabab bo‘lgandi. Garchand 5 marta "Oltin to‘p"ni qo‘lga kiritgan bo‘lsada, 37 yoshli hujumchiga ha deganda jamoa topilavermayapti. Ammo Ronaldu kabi nomni olib kelish ortidan har qanday klub katta foyda ko‘rishi mumkin. Quyida uning uchun ehtimoliy manzillarga to‘xtalib o‘tamiz.

"An-Nasr"

Saudiya Pro-ligasida ikkinchi o‘rinda band etib turgan jamoaga Ronaldu kerak bo‘lib qolgan. Xabarlarga ko‘ra, "An-Nasr" futbolchiga yiliga 173 million funt taklif etgan. Ammo Ronalduning o‘zi hali yevrofutboldan chekinmoqchi emas.

"Real Madrid"

Ronaldu oldida turgan kichik, ammo ehtimoliy manzil uning sobiq klubi bo‘lmish "Real"dir. U aynan mana shu klub bilan katta yulduzga aylangandi. Ayni damda esa portugaliyalik futbolchi "Real" bazasida mashg‘ulotlar o‘tkazmoqda. Karlo Anchelottiga u kerakmi yoki yo‘q, buni bilish ancha qiyin.

"Nyukasl"

Hammasi "qarg‘alar" uchun yaxshi ketmoqda. Ammo klubning egasi bo‘lgan saudiyaliklar Ronalduni olib kelishni istab qolsa, nima bo‘ladi degan savol ham mavjud. Albatta, u kabi katta nom jamoaga ulkan foyda keltiradi.

"LA Gelaksi"

Ronalduni AQSHga keltirishni istayotgan jamoalardan biri Los-Anjelas klubidir. Bu klub o‘z tarkibiga katta nomlarni jalb etishni yaxshi ko‘radi. Masalan, Devid Bekxam, Zlatan Ibragimovich va boshqalar. Ronaldu esa keyingi yulduz bo‘lishi mumkin.

"Sporting"

Ronalduga YECHL futbolini taklif eta oladigan klublardan biri "Sporting"dir. Ronalduning o‘smirlik damlari Lissabonda kechgandi. Ha, "Sporting" Ronalduga u istagan pulni bera olmasligi mumkin. Ammo Yevropaning eng nufuzli musobaqasida ishtirok etish imkoniyatini bera oladi.

ISMATOV J.