“Navbahor”ning yakunlangan mavsumga oid statistik ma’lumotlari bilan tanishtirishda davom etamiz.

Quyida e’tiboringizga “lochinlar”ning Coca Cola Superliga – 2022da qayd etgan  mag‘lubiyatsiz va “quruq” seriyalari bilan tanishtiramiz.

Yakunlangan mavsumda “Navbahor” darvozasiga 13 ta o‘yinda raqiblar to‘p kirita olishmadi.

Albatta, ushbu muvaffaqiyatda jamoamiz darvozaboni O‘tkir Yusupov bilan birgalikda tajribali va mahoratli himoyachilarning ham munosib hissalari bor.

Ta’kidlash joizki, Coca Cola Superliga – 2022da “Navbahor” o‘z darvozasidan eng kam to‘p o‘tkazgan, ya’ni, himoyasi eng mustahkam jamoa (15 ta) bo‘ldi.   

Mavsum – 2022da “lochinlar” uch marta mag‘lubiyatsiz seriyani qayd etishdi. Eng uzoq shunday seriya 14 (!) o‘yindan (6-19-turlar) iborat bo‘ldi hamda ushbu seriyani 20-turda Toshkentda “Bunyodkor” to‘xtatdi (1:2).

Shuningdek, “Navbahor” hisobida bir marta 6 uchrashuv (21-26-turlar) va bir marta 3 bellashuv (1-3-turlar)dan iborat mag‘lubiyatsiz seriya ham mavjud.

Ta’kidlash joizki, o‘tgan mavsumda “lochinlar”  hisobida 4 ta o‘yindan (8-9, 11-12-turlar) iborat “quruq” seriya ham mavjud. Bunga izoh sifatida shuni aytish lozimki, 10-turdan o‘rin olgan “Olimpik” – “Navbahor” (1:1) bahsi ma’lum sabablarga ko‘ra, 12-tur o‘yinidan keyin o‘tkazilgandi.

Bundan tashqari, jamoamiz 3 marta (14-15, 18-19, 24-25-turlar) 2 ta uchrashuvdan iborat “quruq” seriyani ham qayd etishga muvaffaq bo‘ldi.     

Bu esa “Navbahor” darvozaboni O‘tkir Yusupovning yuksak mahorati va himoyachilarimizning ishonchli hamda mustahkam himoya qo‘rg‘onini tashkil etishgani bilan bog‘liq.

“Navbahor” PFK matbuot xizmati.