Xabaringiz bor, bugun mahoratli yarim himoyachi Farrux Ikromov "Navbahor" bilan  ikki yillik shartnoma imzoladi. Shundan so‘ng, futbolchi “Navbahor” PFK matbuot xizmati uchun qisqacha intervyu berdi. Quyida mazkur suhbatni e’tiboringizga havola etamiz.

– Farrux, avvalo “Navbahor”ga xush kelibsiz? Aytingchi, sizni jamoaga kim taklif qildi?
- Meni “Navbahor”ga jamoa bosh murabbiyi Samvel Vyacheslavovich Babayan taklif qildi va ushbu taklifni qabul qilib, Namanganga kelib, mana bugun jamoa bilan shartnoma imzoladim.

- Bungacha “Navbahor”ning o‘yinlarini kuzatarmidingiz?
- Albatta, kuzatardim. “Navbahor” yaxshi jamoa va yakunlangan mavsumda Superligada 2-o‘rinni qo‘lga kiritdi, O‘zbekiston kubogi finalchisiga aylandi. Shu bois, yangi mavsumda “Navbahor”ning muvaffaqiyatlariga hissa qo‘shishga ahd qildim.

Fursatdan foydalanib, “Navbahor” muxlislari borasida ham to‘xtalib o‘tishni joiz deb topdim. Jamoaning uy uchrashuvlarida har doim stadion ishqibozlar bilan to‘ladi, shuningdek, “Navbahor”ning safar o‘yinlariga ham muxlislar borishadi va ular jamoani munosib tarzda qo‘llab-quvvatlashadi. Yangi mavsumda muxlislar ishonchini oqlab, ijobiy natijalarni qayd etishga intilamiz.   

Bizning ma’lumot
Farrux Ikromov – 1998 yil, 9 iyulda Toshkent shahrida tug‘ilgan.
Futbol bilan 9 yoshidan shug‘ullanishni boshlagan.
Birinchi murabbiyi: Sergey Chigatayev.
Ampluasi: yarim himoyachi.
“Bunyodkor” futbol akademiyasi tarbiyalanuvchisi.
2017-2022 yillar davomida “Bunyodkor” jamoasida o‘ynagan.

“Navbahor” PFK matbuot xizmati.