Хабарингиз бор, бугун маҳоратли ярим ҳимоячи Фаррух Икромов "Навбаҳор" билан  икки йиллик шартнома имзолади. Шундан сўнг, футболчи “Навбаҳор” ПФК матбуот хизмати учун қисқача интервью берди. Қуйида мазкур суҳбатни эътиборингизга ҳавола этамиз.

– Фаррух, аввало “Навбаҳор”га хуш келибсиз? Айтингчи, сизни жамоага ким таклиф қилди?
- Мени “Навбаҳор”га жамоа бош мураббийи Самвел Вячеславович Бабаян таклиф қилди ва ушбу таклифни қабул қилиб, Наманганга келиб, мана бугун жамоа билан шартнома имзоладим.

- Бунгача “Навбаҳор”нинг ўйинларини кузатармидингиз?
- Албатта, кузатардим. “Навбаҳор” яхши жамоа ва якунланган мавсумда Суперлигада 2-ўринни қўлга киритди, Ўзбекистон кубоги финалчисига айланди. Шу боис, янги мавсумда “Навбаҳор”нинг муваффақиятларига ҳисса қўшишга аҳд қилдим.

Фурсатдан фойдаланиб, “Навбаҳор” мухлислари борасида ҳам тўхталиб ўтишни жоиз деб топдим. Жамоанинг уй учрашувларида ҳар доим стадион ишқибозлар билан тўлади, шунингдек, “Навбаҳор”нинг сафар ўйинларига ҳам мухлислар боришади ва улар жамоани муносиб тарзда қўллаб-қувватлашади. Янги мавсумда мухлислар ишончини оқлаб, ижобий натижаларни қайд этишга интиламиз.   

Бизнинг маълумот
Фаррух Икромов – 1998 йил, 9 июлда Тошкент шаҳрида туғилган.
Футбол билан 9 ёшидан шуғулланишни бошлаган.
Биринчи мураббийи: Сергей Чигатаев.
Амплуаси: ярим ҳимоячи.
“Бунёдкор” футбол академияси тарбияланувчиси.
2017-2022 йиллар давомида “Бунёдкор” жамоасида ўйнаган.

“Навбаҳор” ПФК матбуот хизмати.