Rossiya terma jamoasi va «Spartak» klubi sobiq bosh murabbiyi Oleg Romansev argentinalik futbol yulduzlari — Diyego Maradona va Lionel Messini o‘zaro taqqosladi.

— Jahon chempionatidagi g‘oliblikdan so‘ng Messini Maradona bilan taqqoslash mumkinmi?
— Messi buyuk futbolchilar safiga kirdi hamda Pele va Maradona bilan bir qatordan o‘rin oldi. Shubhasiz, u Argentina terma jamoasi yetakchisi. Ammo Leo bungacha ham bir nechta JCHda ishtirok etgandi, u faqat Qatardagi musobaqada jahon chempioni bo‘ldi. Shunday ekan, mazkur chempionlikda faqatgina Messining xizmatini e’tirof etish to‘g‘ri bo‘lmaydi.

Maradona esa kuchli xarakterga ega bo‘lgan futbolchi edi. 80-yillarda biz Argentinaga qarshi o‘ynaganimizda, Diyego atigi 20 yoshda edi. U endigia yoshlar o‘rtasidagi JCHda g‘olib chiqqandi. O‘shandayoq uning o‘yini va yetakchilik xususiyati kuchli edi. Bu xususiyatni u futboldagi faoliyatining so‘nggi pallasigacha saqlab qoldi. Bu borada Messi Maradonadan orqada. Boshqa jihatdan esa har ikkisi — buyuk o‘yinchilar. Hozirgi Leo Maradonaga yoqqan bo‘lardi!