Xalqaro futbol assosiasiyalari federasiyasi (FIFA) Qatardagi jahon chempionati finalidan so‘ng maydonga begonalar chiqib kelgani uchun jazo choralarini qo‘llamoqchi.

Argentina va Fransiya terma jamoalari o‘rtasidagi o‘yindan so‘ng maydonga turkiyalik taniqli oshpaz Nusret Go‘kche chiqib, Messini tabriklamoqchi bo‘ldi hamda Kubok bilan suratga tushdi. Oshpazning bu ishiga nisbatan ko‘pchilik o‘z noroziligini bildirdi.

Reglamentga ko‘ra, taqdirlash marosimida jamoalar, uchrashuv va FIFA rasmiylari hamda mamlakatlar rahbarlari ishtirok etishi mumkin.

«FIFA tomonidan o‘tkazilgan surishtiruv ishlari natijasida maydonga kirish huquqiga ega bo‘lmagan ba’zi shaxslar taqdirlash marosimida ishtirok etgani aniqlandi. Choralar ko‘riladi», — deya xabar tarqatdi FIFA matbuot xizmati.