Hududi bo‘yicha mittigina Qatarning bag‘ri ancha kengligi JCH-2022 davomida yaqqol sezildi.

 Dunyoning turli burchaklaridan o‘z jamoalarini qo‘llab-quvvatlash uchun Doxa safariga chiqqan minglab muxlislar mamlakat ichida ma’lum cheklovlar joriy etilganiga qaramay, chinakamiga yayrashdi. Har holda, shohona stadionlar tribunalarida o‘zgacha qaynoqlik kuzatildi o‘yinlar davomida. Osiyoda nafaqat oddiy fanatlar, balki mundial ishtirokchilarining yaqinlari, turmush o‘rtoqlari, farzandlari va mahbubalari ham o‘zlarini o‘ta erkin his qilishdi.

Ayniqsa, Argentinadan tashrif buyurgan muxlislarga gap yo‘q. Ular tufayli Lionel Skaloni jamoasi finalda xuddi o‘z maydonida o‘ynayotgandek bo‘lgandir. Argentinalik futbolchilarni qo‘llab-quvvatlash bobida jonkuyar fanatlar qatori ularning turmush o‘rtoqlari va mahbubalari ham o‘ta faollik ko‘rsatishdi. Ular bu masalada norasmiy chempionga ham aylanishdi. Har holda, yangi g‘olib tarkibidagi deyarli barcha futbolchilarning hamxonalari yoki qalliqlari Qatarga tashrif buyurdilar. Ular tribunalarda faol bo‘lish barobarida ijtimoiy tarmoqlarni ham chiroyli postlar bilan bezashdi.

Ayniqsa, Lionel Messining turmush o‘rtog‘i Antonella (o‘g‘illari - Tyago, Mateo hamda Chiro bilan), Gonsalo Montyelning qallig‘i Karina, Leandro Paredesning hamxonasi Kamila, Xulian Alvaresning shaxsiy muxlisasi Emiliya va Lautaro Martinesning mahbubasi Avgustino Gandolfo ajralib turishdi. Agar Qatarda mundial bilan parallel ravishda «Jahon futboli go‘zallari» tanlovi uyushtirilganidami, unda Argentina termasi futbolchilarining hurliqo umr yo‘ldoshlari va mahbubalari g‘alaba qozonishardi, albatta. Muhimi, ular o‘z kavalerlari muvaffaqiya­tiga munosib hissa qo‘shishdi. Chempionlikka go‘zal tirgak!