1 yanvar kuni top-5 ligalarda qishki transfer oynasi rasman ochildi. Bu degani jamoalar yangi transferlar orqali o‘z tarkibini yanada kuchaytirishi mumkin degani. Biz esa allaqachon amalga oshirilgan top transferlar haqida ma’lumot beramiz.
Krishtianu Ronaldu - "Manchester Yunayted"dan "An-Nasr"ga, bepul transfer
Pirs Morgan bilan shov-shuvli intervyudan so‘ng, Krishtianu va "Manchester Yunayted" shartnomani bekor qilishdi. Ronaldu "Real Madrid" bazasida mashg‘ulot o‘tkazdi, ammo "Oltin to‘p"ning 5 karra sohibiga faqat Saudiya Arabistonining "An-Nasr" klubi taklif bilan chiqdi. Yaqin Sharqdagi mavsum davomida portugaliyalik yiliga 200 million yevro ishlab oladi (ulardan 90 millioni – kafolatlangan maosh, qolgani – reklama bonuslari).
Kodi Gakpo PSVdan "Liverpul"ga, 42 million yevro
Yurgen Klopp yana bir hujumchi sotib olib, mavsumni saqlab qolishga harakat qilmoqda. Jahon chempionati yulduzi va bu mavsumda samarali harakatlar amalga oshirish bo‘yicha Yevropaning yetakchilaridan biri 42 million yevroga sotib olindi, biroq bu summa bonuslarni hisobga olgan holda 50'ga yetishi mumkin.
David Datro Fofana – "Molde"dan “Chelsi”ga, 12 million yevro
"Chelsi"da ivuarlik hujumchi bo‘lishi kerak - Todd Bouli "Molde"ning 20 yoshli hujumchisi bilan shartnoma imzolaganida shunday deb o‘ylagan. Aytgancha, David Fofana “Oltin butsa” uchun kurashda 14-o‘rinda bormoqda. Hujumchi ijaraga berilishi haqida mish-mishlar tarqaldi, ammo feyk bo‘lishi mumkin - Grem Potterda hujum chizig‘ida hozirda unchalik ko‘p imkoniyatlar yo‘q.
Mateus Kunya - "Atletiko"dan "Vulverxempton"ga, ijara
Bir necha mavsum avval "Vulverxempton" Premyer-ligadagi eng qiziqarli hujum juftligiga ega edi - Raul Ximenes va Diogo Jota juftligi ko‘p va chiroyli gollar urishardi. Ammo portugaliyalik "Liverpul"ga yo‘l oldi va Ximenes boshidan jarohat olganidan keyin o‘zining formasiga qayta olmadi. Yozda "bo‘rilar" Sasha Kalayjich yordamida muammoni hal qilishga harakat qilishgan, biroq u birinchi uchrashuvdayoq jiddiy jarohat olgandi.
Qishda ular Simeone bir yarim yil avval 30 millionga sotib olgan braziliyalik Mateus Kunyani "Atletiko"dan olib kelishdi. Bu mavsumda braziliyalik futbolchi "matraschilar" safida 17ta o‘yinda gol ura olmadi. Agar Kunya ma’lum shartlarni bajarsa, "bo‘rilar" 23 yoshli hujumchini 50 million yevroga sotib olishadi.
Luis Suares – “Nasyonal”dan “Gremio”ga, bepul transfer
Urugvaylik hujumchi olti oyni qiziqarli o‘tkazdi. U vataniga "Nasyonal" safiga qaytdi, terma jamoa bilan 2022 yilgi jahon chempionatiga yo‘l oldi va endi u Braziliyaning "Gremio"siga o‘tdi. U yerda uni yaxshi do‘st Lukas Leyva kutmoqda - ular "Liverpul"da birga o‘ynashgan.
Hozircha qishki transfer oynasida amalga oshirilgan eng yaxshi transferlar shulardan iborat. Transfer oynasi endigina ochilganini hisobga olsak, hali bu ro‘yxat yanada kattalashishi aniq.
