«Roma»dan ketishi kutilayotgan Eldor Shomurodov Yevropa top-5 chempionatlaridagi yagona vakilimiz hisoblanadi.
Biroq, O‘zbekiston milliy terma jamoasining yana bir hujumchisi - Bobur Abduxoliqov ham eng kuchli ligalardan biriga o‘tish maqsadida bir necha klublar taklifini rad etmoqda. Bobur Abduxoliqov 2022 yilgi mavsumni Belarus chempionatining oliy ligasida «Energetik-BGU» tarkibida o‘tkazdi. Mavsum davomida 30ta uchrashuvda qatnashgan hamyurtimiz raqiblar darvozasini 26 marotaba ishg‘ol qilib, jamoasining chempionat kumush medaliga ega chiqishiga katta hissa qo‘shdi. Endilikda u o‘z imkoniyatlarini kuchli chempionatlarda sinab ko‘rmoqchi. Legionerimiz Belarus jurnalistlariga intervyu berib, rejalari bilan o‘rtoqlashdi.
- «Energetik-BGU»da ajoyib mavsum o‘tkazdingiz. Bunday samaradorlikka sizni kim ilhomlantirdi?
- Kuniga ikki mahal mashg‘ulot, istak va maqsad.
- Intervyulardan birida klubdan ketishdan oldin ming marta o‘ylab ko‘raman, degandingiz. Bu qarorga kelishingizga sabab bo‘lgan omil qaysi?
- Yaxshi chempionatda o‘ynashni istayman, maqsadim «top-5» ligalaridan biri, aynan mana shu orzu sari qadam tashlashning ayni payti, deb hisoblayman.
- Belarus klublaridan taklif bo‘ldimi?
- Yo‘q.
- Hozir faoliyatingizni davom ettirishingiz uchun variantlar bormi?
- Bor, Vengriya, Polsha, Turkiyadan takliflar bo‘lyapti.
- Kuchli beshlik chempionatlari jamoalardanchi?
- Turli klublardan bor.
- Pul yoki istiqbolli klub tanlovi yuzaga kelsa, qaysi birini tanlaysiz?
- Istiqbolli klubni tanlayman, albatta.
- «Energetik-BGU» muxlislariga yangi mavsum oldidan nimalar deya olasiz?
- Men ularga qo‘llab-quvvatlab turganlari uchun katta rahmat aytaman va ularni hamisha sog‘inib qolaman. Yangi mavsumda ham o‘zlari yaxshi ko‘rgan jamoani xuddi shunday qo‘llashda davom etishlarini so‘rab qolaman.
Bobur Abduxoliqovning rekordlari
To‘purar legioner - 26ta gol;
Mehmondagi gollar - 16ta;
Eng foydali legioner (gol+pas) - 32 ochko;
G‘alaba gollari (Roman Vasilyuk bilan birga) - 10ta;
Dubllar (Andrey Xlebosolov bilan birga) - 6ta.
