Mavsumlar oralig‘ida “Rubin” klubiga ko‘chib o‘tgan o‘zbekistonlik himoyachi Rustam Ashurmatov yangi jamoadagi dastlabki taassurotlari haqida klub matbuot xizmatiga gapirib berdi.

- “Rubin“ga o‘tishdagi birinchi his-tuyg‘ular shunchaki super. Anchadan beri kuchli ligada o‘ynashni orzu qilardim. Shunday ekan, “Rubin”ga kelganimdan juda xursandman. Yozda ular menga murojaat qilishgandi, ammo o‘sha paytda “Navbahor” bilan shartnomam borligi sababli Qozonga kela olmagandim.

- Yangi jamoada Sizni qanday kutib olishdi? Yig‘inning dastlabki kunlaridan qanday taassurotlar qoldi?

- Hammasi ajoyib bo‘ldi. Futbolchi va murabbiylardan bunday tarzda kutib olishlarini kutmagandim, juda yoqimli bo‘ldi. O‘zimni jamoada anchadan beri o‘ynayotgandek his qildim.

- “Rubin”da hamyurtingiz Umarali Rahmonaliyev ham bor. Moslashish borasida bir-biringizga yordam beryapsizlarmi? Jamoada yana kim bilan yaxshiroq tanishib oldingiz?

- Uni ham “Rubin”ga o‘tganiga hali ko‘p vaqt bo‘lmadi. Albatta moslashish borasida bir-birimizga yordam beryapmiz. Umuman olganda “Rubin”da hamma bilan yaxshi munosabatdaman.

- Rossiyada havo ancha sovuq. Sovuqda o‘zingizni qanday tutasiz? Noldan past haroratlarda o‘ynashga tayyormisiz?

— O‘zbekistonda ham qishda sovuq bo‘lgani uchun ko‘nikkanmiz. To‘g‘ri, Rossiyada sovuqroq, lekin bunday sharoitda o‘ynash mumkin.

- O‘zingiz haqingizda gapirib bering. Qaysi pozisiyada o‘ynaysiz? Qanday kuchli tomonlaringiz bor?

- Markaziy himoyachiman. O‘ylaymanki, murabbiylar xizmatimdan shu pozisiyada foydalanishadi. Kuchli tomonlarim haqida gapirishim qiyin. Yaxshisi, bunga murabbiy va muxlislar baho berishsin.

- Joriy mavsumdagi maqsadlaringiz qanday?

- Albatta, Premyer-ligaga chiqish kerak. Bu borada jamoaga qo‘limdan kelgancha yordam bermoqchiman.

- Qozon haqida nimalarni bilasiz?

- Garchi shahar haqida ko‘p eshitgan bo‘lsamda, Qozonda birinchi marta bo‘laman. Bu juda go‘zal shahar va men u haqda ko‘proq bilishni xohlayman.