Madridning "Atletiko" klubi kataloniyaliklar hujumchisi Memfis Depayni transfer qilish shartlari bo‘yicha "Barselona"ga ultimatum qo‘ydi. Bu haqda Relevo xabar bermoqda.
Manbaga ko‘ra, "Atletiko" belgiyalik yarim himoyachi Yannik Ferreyra Karraskoni Depayga almashtirmoqchi emas. Boz ustiga, madridliklar rahbariyati qishki transfer oynasida niderlandiyalik futbolchi uchun hatto tovon puli ham to‘lamoqchi emas. Agar "Barselona" qishda Depayni Madrid klubiga qo‘yib yubormasa, "Atletiko" "Braga"dan Vitinyoni sotib oladi.
“Atletiko” Karraskoni 60 million yevroga qo‘yib yuborishga tayyor. Ma’lum qilinishicha, “matraschilar” belgiyalik futbolchining “Barselona”ga ketishiga to‘sqinlik qilmaydi, agar “ko‘k-anorranglilar” futbolchining tovon pulini to‘lashga rozi bo‘lsa.
