A Seriya grandi yana janjallarga aralashib qoldi. Turinliklardan 15 ochko olib tashlandi
«Yuventus» yana katta janjalga sabab bo‘ldi va jiddiy sport jazosini oldi! Hozircha, 2006 yildagidek, A Seriyadan chetlatilgani yo‘q, ammo «keksa sinyora» keyingi mavsumda yevrokuboklarsiz qolishi mumkin. Corriere dello Sport xabariga ko‘ra, Italiya futbol federasiyasi (FIGC) sud talabini qanoatlantirdi va moliyaviy firibgarlik tufayli Turin klubidan 15 ochko olib tashlash haqida qaror chiqardi. Juma oqshomiga qadar «Yuventus» uchinchi o‘rin va Chempionlar Ligasi zonasida edi, endi esa o‘ninchi o‘ringa tushadi. «Lasio», «Roma» va «Atalanta»dan 12 ochkoga ortda qoladi. Oktyabr-yanvar oylarida Massimiliano Allegri shogirdlari Italiya chempionatida gol o‘tkazib yubormasdan ketma-ket sakkizta g‘alabani qo‘lga kiritishgan bo‘lsada, «Yuventus»ning endi ham mavsum yakuniga qadar YECHL zonasi uchun ochkolarni yig‘ishiga ishonish qiyin. Bundan tashqari, Turin klubining sobiq rahbarlari ham jazolandi. Fabio Paratichi («Yuventus»ning sobiq sport direktori) ikki yarim yilga, Andrea Anyelli (prezident) va Maurisio Arrivabene (bosh direktor) ikki yilga, Federiko Kerubini (sport direktori) bir yilu to‘rt oyga futboldan chetlashtirildi. Vise-prezident Pavel Nedved esa yengil diskvalifikasiyaga uchradi: chex sakkiz oyga diskvalifikasiya qilindi. «Yuventus»ning sobiq rahbariyati 2022 yilning noyabr oyi oxirida iste’foga chiqqan edi. Anyelli va uning jamoasi lisenziyalash va moliyaviy feyr-pley qoidalarini buzganlikda: futbolchilarning transfer narxini oshirib yuborishda, xodimlarning maoshini past ko‘rsatishda va futbolchilar daromadlarining haqiqiy hajmini yashirishda ayblangan. Koronavirus pandemiyasi davrida klub 17 nafar futbolchiga yashirincha 60 million yevro to‘lagan. Turinliklar rahbarlari futbolchilar maoshlarining bir qismidan voz kechganliklari va qonunni chetlab o‘tib, ular bilan bu pulni kelishganliklarini ochiqchasiga aytdi. Jumladan, Krishtianu Ronaldudan klubni 19,9 million yevro qarzi bor, u klubni sudga bermoqchi.
La Stampa nashri Kerubini va «Yuventus» advokati Chezare Gabazio o‘rtasidagi telefon suhbati mazmunini e’lon qildi. «Ronaldu bilan maxfiy kelishuv oshkor etilmasligi kerak, chunki bu sodir bo‘ladigan bo‘lsa, ular bizning tomog‘imizdan mahkam ushlab, auditorlarga hujum qilishadi va hokazo. Va keyin biz xayoliy bitimni amalga oshirishimiz kerak bo‘ladi», degandi Kerubini. Taniqli jurnalist Janluka Di Marsioning ta’kidlashicha, tergov ostidagi «Yuventus» rahbarlari 20 ming yevrodan 5 million yevrogacha jarima va bir yildan sakkiz yilgacha qamoq jazosiga hukm qilinishi mumkin. Dekabr oyida Anyelli moliyaviy firibgarlik haqidagi da’volarga izoh bergandi: «So‘nggi yillarda «Yuventus»ga bo‘lgan katta muhabbatim tufayli maydonda ham, uning tashqarisida ham natijalarga erishish uchun bor kuchimni sarfladim. «Yuventus» hamma narsadan ustun. Ishonchim komilki, so‘nggi yillarda to‘g‘ri ish qilganman va bizga qo‘yilgan ayblovlar asossiz». La Gazzetta dello Sport nashriga ko‘ra, agar moliyaviy qoidabuzarliklar isbotlansa, UYEFA Turin klubini yevrokuboklardan chetlashtirishga tayyorligini yozdi. «Yuventus» Italiya sudining qarori ustidan shikoyat qilish huquqiga ega. Turin klubi buni uddalashi aniq, har doimgidek.
