"PSJ" hujumchisi Lionel Messi parijliklar klubi bilan shartnomasini uzaytirish borasida muzokaralar olib bormoqda, deb xabar beradi L'Equipe. Tomonlar bir nechta tafsilotlarni kelishib olishlari kerak.
Manbaga ko‘ra, "Inter Mayami" hujumchini o‘z safiga qo‘shib olmoqchi, biroq Messi Argentina terma jamoasida hech bo‘lmaganda 2024 yilgi Amerika Kubogigacha to‘p surishni va Yevropaning top-klublarida o‘ynashni istamoqda.
35 yoshli hujumchi, shuningdek, Chempionlar ligasida gol urish bo‘yicha "An-Nasr" hujumchisi Krishtianu Ronalduga tegishli (140 ta gol) rekordini ham yangilamoqchi. Messi 129 gol bilan ikkinchi o‘rinda.
Messi 2021 yilning avgustidan beri “PSJ” safida to‘p suradi. Uning klub bilan amaldagi shartnomasi 2023 yilning iyunida yakuniga etadi. Transfermarkt portali futbolchining narxini 50 million yevroga baholamoqda.
Leo joriy mavsumda "PSJ" safida barcha turnirlar doirasida 21 ta o‘yinda maydonga tushib, 13 ta gol urdi va 14 ta golli uzatmani amalga oshirdi.
