"ПСЖ" ҳужумчиси Лионель Месси парижликлар клуби билан шартномасини узайтириш борасида музокаралар олиб бормоқда, деб хабар беради L'Equipe. Томонлар бир нечта тафсилотларни келишиб олишлари керак.
Манбага кўра, "Интер Майами" ҳужумчини ўз сафига қўшиб олмоқчи, бироқ Месси Аргентина терма жамоасида ҳеч бўлмаганда 2024 йилги Америка Кубогигача тўп суришни ва Европанинг топ-клубларида ўйнашни истамоқда.
35 ёшли ҳужумчи, шунингдек, Чемпионлар лигасида гол уриш бўйича "Ан-Наср" ҳужумчиси Криштиану Роналдуга тегишли (140 та гол) рекордини ҳам янгиламоқчи. Месси 129 гол билан иккинчи ўринда.
Месси 2021 йилнинг августидан бери “ПСЖ” сафида тўп суради. Унинг клуб билан амалдаги шартномаси 2023 йилнинг июнида якунига этади. Transfermarkt портали футболчининг нархини 50 миллион еврога баҳоламоқда.
Лео жорий мавсумда "ПСЖ" сафида барча турнирлар доирасида 21 та ўйинда майдонга тушиб, 13 та гол урди ва 14 та голли узатмани амалга оширди.
