«Yaxshi tushlar ko‘ring, otajon!» - bu mashhur Devid Bekxem o‘z o‘g‘li Romeodan qabul qilib olgan istehzoli salom mazmuni.

Nega istehzoli? Hammasi oddiy: bu tilak zamirida «MYU»ning oxirgi mag‘lubiyatiga sha’ma bor.

Angliya chempionati 21-turidan o‘rin olgan «Arsenal» - «MYU» o‘yini futbolga ozgina qiziqadigan barcha-barchani befarq qoldirmagan bo‘lsa kerak. Jumladan, Bekxemlar oilasini ham. Eslatma, Mikel Arteta boshqaruvidagi «kanonirlar» turning markaziy uchrashuvida irodali g‘alaba (3:2)ga erishib, mag‘lubiyatsiz odimlarini davom ettirishdi. Uzoq kutilgan chempionlikka asta-sekin yaqinlashayotgan «Arsenal» shuning barobarida «MYU»ning mag‘lubiyatsiz seriyasiga nuqta qo‘ydi.

Bu holatdan vaqtida «kanonirlar» akademiyasida shug‘ullagan Romeo Bekxem o‘rnida foydalanib qolishni istadi, shekilli, darhol «MYU» afsonasi sanalgan otasiga «qaynoq salom» yubordi. Xullas, Beksning uchinchi o‘g‘li o‘yindan so‘ng ijtimoiy tarmoqdagi sahifasiga otasi suratini joylashtirib, lo‘ndagina izoh qoldirdi: «Yaxshi tushlar ko‘ring, otajon!»

Eslatish kerak, Romeo yaqinda otasiga tegishli «Mayami» klubidan «Brentford»ga o‘tgandi. Aniqroq aytsak, kichik Bekxem» bu klub safida ijara muddatini o‘taydi. Ko‘rinishidan, u «Arsenal»ga befarq emas hamon. Ehtimol, otasi bilan «MYU» va «Arsenal»ga bog‘liq qandaydir garov ham bog‘lagandir...