Hozirda Kataloniyaning «Barselona» jamoasi La Liga 2022/23 yilgi mavsumda ashaddiy raqibi «Real Madrid»ni 8 ochkoga ortda qoldirib, chempionlik uchun dadil qadam bilan odimlab bormoqda. «Ko‘k-anorranglilar»ning chempionlikni qo‘lga kiritmasliklari uchun g‘ayrioddiy bir voqea yuz berishi kerak. Jamoa yaqin 30 kun ichida ligada 7 ta o‘yinini o‘tkazishi kerak, va ularning barchasi deyarli juda muhim. Biroq, klub uchun qiyinchilik tug‘dirishi kutilayotgan ikki raqib bor.

«Kadis» bilan o‘yin

Ushbu mavsumning birinchi davra o‘yini oldidan «Kadis» «Barsa» uchun jiddiy raqibdek ko‘ringandi. Kataloniyaliklar o‘sha bahsda 4:0 hisobida zafar quchgan bo‘lsa-da, undan avvalgi 4 ta o‘yinda «ko‘k-anorranglilar» g‘alaba nimaligini bilmagan. Jamoada Leo Messi o‘ynagan davrda ham «Kadis»ni yengish ancha qiyin ish bo‘lgan.

Hozir «Kadis» turnir jadvalida 18-o‘rinda, ammo mutaxassislar o‘zaro o‘yinda yana sensasiya kuzatilishi mumkin deb hisoblamoqda.

Klasiko

«Barselona» va «Real» o‘rtasidagi har qanday o‘yinda jamoalarning tarkibi va sport formasidan qat’iy-nazar imkoniyatlar - 50/50. Tarkib va unvonlar bo‘yicha ligada «Barsa»ga to‘g‘ri keladigan faqat bitta jamoa bor va u aynan «Real Madrid».

Qiziqarli fakt: «blaugrana» oktyabr oyida «qaymoqranglilar»ga 3:1 hisobida mag‘lub bo‘lganidan beri Ispaniya chempionatida biror o‘yin ham mag‘lub bo‘lmagan. Ikki klub to‘qnash kelgan boshqa turnirlarni olib tashlasak, so‘nggi beshta o‘yinda «Klasiko»da shaxsiy uchrashuvlarda eng yaxshi natija Madridda bo‘lgan.

Bu o‘yinlar oldidan «Barsa» Yevropa ligasida «Yunayted» bilan to‘qnash keladi. La Ligada «Vilyarreal» (12 fevral, Ispaniyada 5-o‘rin), shuningdek, «Atletik Bilbao» (12-mart, 7-o‘rin) bilan janglar kutmoqda.