"Atalanta"ning turkiyalik himoyachisi Merix Demiral "Yuventus"ning Krishtianu Ronaldu ismli va portugaliyalikning avtografi tushirilgan formasini sotmoqchi. Bu haqda turkiyalik futbolchi o‘zining ijtimoiy tarmog‘ida yozgan.
"Men Krishtianu bilan gaplashdim, u Turkiyada sodir bo‘lgan voqeadan juda xafa ekanligini aytdi. Men o‘z kolleksiyamdagi uning futbolkasini kimoshdi savdosiga qo‘yaman", — deb post qoldirdi Demiral.
Himoyachining tushuntirishicha, savdodan tushgan barcha mablag‘ Turkiyadagi zilzila qurbonlariga yordam berish uchun sarflanadi. Eslatib o‘tamiz, zilzila mamlakatning janubi-sharqiga ta’sir ko‘rsatdi - Gaziantep, Qahramanmarash, Malatya, Antakya, Iskenderun va Shanliurfa kabi yirik shaharlarga salbiy ta’sir ko‘rsatdi.
