«Barselona» bosh murabbiyi Xavi Ispaniya chempionatining 21-turi doirasida bo‘lib o‘tgan «Vilyarreal»ga qarshi o‘yin (1:0) borasida o‘z fikrini bildirib o‘tdi.

«Juda qiyin o‘yin bo‘ldi. «Vilyarreal» personal ta’qibdan foydalanadi. Yuqori pressing qo‘llaydi va hech narsa qilishga yo‘l bermaydi.

Biz juda ko‘p hujumlar tashkil qildim, ammo so‘nggi hal qiluvchi pas yetishmadi. Agar gol urmasang, muammolar boshlanadi.

Ammo biz juda muhim 3 ochkoni qo‘lga kiritdik va sovrin uchun kurashishda davom etamiz. O‘yin taqdirini hal qilib qo‘yish uchun bizda juda ko‘p imkoniyatlar bo‘ldi.

Bugungi bahsda ko‘p narsa pressing paytida to‘pni kim kimdan olib qo‘yishiga bog‘liq edi. Biz shunday uslub bilan ko‘p gol uryapmiz. Bugun ham shuning evaziga g‘alaba qozondik.

Bizning birinchi himoyachimiz – Levandovski. Agar u faol harakat qilsa, qolganlar o‘z vazifalarini bajarishadi.

Mark-Andre ter Stegen so‘nggi vaqtda ajoyib o‘yin ko‘rsatmoqda. U yana bir "quruq" o‘yin o‘tkazdi. Ba’zi xatolarni inobatga olmaganda, «Vilyarreal»ga imkon bermadik.

Jamoam menda juda yaxshi taassurot qoldirdi. Biz jismoniy jihatdan yaxshi formadamiz», – dedi Xavi.