Italiyalik taniqli insayder Fabrisio Romano Markus Reshfordning "Manchester Yunayted" bilan yangi shartnomasi haqida ma’lumot berdi.

“Yunayted”dagilar mavsum yakuniga qadar yangi shartnoma imzolash uchun bor kuchlarini ishga solishmoqda. Klub allaqachon taklif bilan chiqqan va endi futbolchining manfaatlarini himoya qiluvchi Reshfordning akasi bilan muzokaralar olib bormoqda. Hozircha hech narsa hal qilinmadi, muzokaralar jarayoni davom etmoqda. Ten Xag Reshford bilan tezroq shartnoma imzolashni qat’iy talab qilmoqda, chunki u Markusning yangi "Manchester Yunayted"ning yuziga aylanishini kutmoqda. Va, albatta, Reshford uchun klub bilan shartnomani uzaytirish ustuvor variant hisoblanadi", - deb yozgan Romano.

Mankunianliklar tarbiyalanuvchisi hisoblangan 25 yoshli Reshfordning amaldagi shartnomasi 2024 yilgacha tuzilgan. U joriy mavsum 34 ta o‘yinda 21 ta gol urib, 8 ta golli uzatma berdi.