“Manchester Siti” Angliya Premyer-ligasi 12-turining qoldirilgan bahsida safarda chempionlik poygasidagi asosiy raqibi “Arsenal”ni mag‘lub etdi. Biroq, bu o‘yinda “kanonirlar” muxlislari faxrlanishi mumkin bo‘lgan bir narsa bor – “shaharliklar” o‘yin davomida bor yo‘g‘i 36 foiz to‘p bilan harakat qilishdi. Bu Gvardiola "Siti"ga kelganidan buyon eng past ko‘rsatkich. Qiziqarli faktni OPTA baham ko‘radi.
Eslatib o‘tamiz, "Emireyts"dagi g‘alaba "Manchester Siti"ga ochkolar soni bo‘yicha "Arsenal" bilan tenglashib, APL turnir jadvalida birinchi o‘rinni egallash imkonini berdi. Hozirda ikkala jamoada ham 51 ochko bor, ammo “kanonirlar”ning yana bir zaxira o‘yini bor.
APLning navbatdagi turida “shaharliklar” safarda “Nottingem Forest” bilan to‘qnash kelishsa, “Arsenal” Birmingemda “Aston Villa” uyida mehmon bo‘ladi.
