"PSJ" hujumchisi Lionel Messi va himoyachisi Presnel Kimpembe klubning transfer siyosatidan noroziligini bildirdi, deb xabar beradi L'Equipe.

Nashrning yozishicha, Messi va Kimpembe klub rahbariyati 2022 yilning yozida yarim himoyachi Leandro Paredesning "Yuventus"ga, yarim himoyachi Idriss Geye "Everton"ga ketishiga, shuningdek, yarim himoyachi Yulian Drakslerni "Benfika"ga ijaraga berishga qanday ruxsat berganini tushunmayapti. Uning o‘rniga "Vulverxempton"dan Vitinya, "Napoli"dan Fabian Ruis va "Valensiya"dan Karlos Soler sotib olindi.

Shuningdek, "PSJ" futbolchilari hujumchi Arno Kalimuendoning "Renn"ga sotilishi va uning o‘rniga Ugo Ekitikening kelishini ma’qullamadi. Futbolchilar, shuningdek, “Inter” himoyachisi Milan Shkrinyar qishda Parij klubiga o‘tmaganidan norozi, chunki ular himoya chizig‘ini kuchaytirish zarur deb hisoblaydilar.

Parijliklar 23 turdan keyin 54 ochko bilan Fransiya chempionati turnir jadvalida peshqadamlik qilmoqda.