Xabar berganimizdek, kecha Namangan shahridagi “Pahlavon” sport majmuasida “Navbahor”ning taqdimot marosimi o‘tkazildi va unda jamoa tarkibiga yangi qo‘shilgan futbolchilar tanishtirilib, “lochinlar”ning bo‘lajak mavsum davomida foydalanadigan futbolkalari taqdimoti o‘tkazildi.

“Navbahor” safiga qishki transfer “oynasi” paytida qo‘shilgan yangi o‘yinchilar qatoridan mahoratli yarim himoyachi Oston O‘runov ham o‘rin oldi va u yangi mavsumda 7-raqam ostida o‘ynaydigan bo‘ldi.

O‘runovni yaqindan tanishtiradigan bo‘lsak, u 2000 yilda Navoiy shahrida tug‘ilgan. “Paxtakor” futbol maktabi tarbiyalanuvchisi va “sherlar”ning turli yoshdagi jamoalarida o‘ynagan.   

2017 yilning 2-davrasida “Navbahor” tarkibiga qo‘shilgan Oston O‘runov aynan “lochinlar” tarkibida 2017 yilning 21 sentyabrida Superliga (oliy liga)da  debyut qilgan.

O‘runov "Navbahor"tarkibida 2017 - 2019 yillar mavsumi davomida to‘p tepib, jami 42 ta o‘yinda maydonga tushib, 2 ta gol urgan. 2019 yilning 2-davrasini “Lokomotiv” (Toshkent)da o‘tkazgan mahoratli yarim himoyachi 2020 yili Rossiyaga yo‘l oladi hamda mazkur mamlakatning “Ufa” (Ufa), “Spartak” (Moskva), “Ural” (Ekaterinburg) jamoalarida faoliyat yuritadi. O‘tgan yilgi mavsumni esa “Ural” safida o‘tkazgan.

Shuningdek, Oston O‘runov futbolchilik faoliyati davomida O‘zbekistonning turli terma jamoalarida to‘p tepgan va 2019 yildan buyon milliy terma jamoamizga nomzod futbolchi sanaladi. O‘runov terma jamoamizda 9 ta o‘yinda maydonga tushib, 2 ta gol urgan.

«Navbahor» PFK matbuot xizmati.