Yakshanba kuni Londondagi "Uebli" stadionida joriy mavsumdagi turnirlarning ilk finali bo‘lib o‘tadi. Unda "MYU" va "Nyukasl" klublari Angliya liga kubogi bosh sovrini uchun bahs olib boradi. So‘nggi xabarlarga ko‘ra, "Manchester Yunayted"ning to‘purar hujumchisi Markus Reshford, ushbu uchrashuvni o‘tkazib yuborishi mumkin. 25 yoshli futbolchi "Barselona"ga qarshi bahsda o‘zini yomon his qilgani sababli maydonni tark etgandi. Reshford bu mavsumda 24 ta golga mualliflik qilishga ulgurdi.
U o‘sha o‘yindan keyin ijtimoiy tarmoqlaridagi sahifasiga rasm joyladi. Unda futbolchi o‘ng oyoq butsasini qo‘lga olgancha, tunneldan kirib ketayotgani tasvirlangan. Bu narsa ko‘plab muxlislarda xavotir uyg‘ota boshladi. Negaki, u yakshanba kungi finalni o‘tkazib yuborishi mumkin. Shunga qaramay, jamoa ustozi Erik ten Xagda Reshfordsiz ham yaxshi o‘yin ko‘rsata oladigan futbolchilar tanlovi bor. Niderlandiyalik mutaxassisga "MYU"dagi ilk titulni qo‘lga kiritish uchun eng kuchli vakillardan tashkil qilingan o‘n bittalik kerak bo‘ladi. Negaki, bu jamoa so‘nggi olti yilda hech vaqo yuta olmay kelmoqda.
Demak, taxminlarga o‘tamiz. Reshford bo‘lishi yoki bo‘lmasligidan qat’iy nazar, hujumda Vaut Vegxorst harakat qiladi. Ammo chap qanotni Reshfordsiz qayta ko‘rib chiqishga to‘g‘ri keladi. Chap uchun Jeydon Sancho bitta variant. U har ikki qanotda harakat qilishga qodir. Ammo Brunu Fernandesh ham o‘sha qanotda o‘ynab bera oladi. O‘ng uchun esa Alexandro Garnacho va Antoni kurash olib boradi. Markazda 4-3-3 taktik sxemasi uchun Kazemiro, Sabitser va Fred triosi tanlab olinadi.
Himoya, qanotlarda Lyuk Shou va Van-Bissaka bilan, markazda Rafael Varan va Lisandro Martineslardan tuziladi. Shuningdek, Martinesni Xarri Maguayr, Van-Bissakani esa Diyegu Dalot almashtirishi ham mumkin. Lyuk Shouga esa chap qanotda Tirell Malasiya raqobat uyushtiradi. Kimlarni qay uslubda tanlashdan qat’iy nazar, darvoza sohasini David De Xea himoya qiladi. Yuqoridagi uslubiyatlardan "Nyukasl" uchun eng ma’qulini tanlab olish Erik ten Xagga bog‘liq. Sovrin yutish uchun tanlovlarni to‘g‘ri qilish talab etiladi.
ISMATOV J.
