Kataloniyaning "Barselona" klubi "Manchester Siti" bilan hujumchi Xulian Alvaresning ehtimoliy transferi borasidagi muzokaralar jarayoniga kirishdi. Bu haqda Sport.es nashri xabar bermoqda.

OAVning ma’lum qilishicha, "ko‘k-anorranglilar" argentinalik hujumchini keyingi mavsumda ijaraga olishni rejalashtirmoqda. "Barselona" argentinalik hujumchini asosiy tarkib futbolchisiga aylantirishga tayyor, chunki Xulian "Manchester Siti" tarkibida Erling Xolandning soyasida qolib ketmoqda.

Xulianning o‘zi "Manchester Siti"dagi mavqeidan norozi va klubini o‘zgartirishga tayyor. Uning klub bilan shartnomasi 2027 yilning o‘rtalariga qadar mo‘ljallangan.

Joriy mavsumda hujumchi klub safida 30 ta o‘yinda maydonga tushib, 10 ta gol urdi va 8 ta golli uzatmani amalga oshirdi.