Nihoyat, Mavsum-2023 ostonamizda turibdi. Muxlislar sog‘ingan kunlar yaqin. “Andijon” jamoamiz Superliganing birinchi turida safarda “Nasaf” bilan o‘ynaydi. Yana kuchlilar orasiga qaytgan “Burgutlar”ni oldinda «Nasaf»ga qarshi muhim uchrashuv kutyapti.

Ikkala raqib bir-biri uchun eski tanishlar. Ularning chempionatdagi o‘yinlar tarixi 1997 yildan boshlangan. Ilk to‘qnashuvda darvozalar daxlsiz qolgandi.

Xullas, shu paytgacha “Nasaf” – “Andijon” jamoalari chempionat doirasida rasmiy ravishda 42 ta o‘yinda maydonga tushishgan. O‘zaro o‘yinlar tarixidagi ustunlik “Nasaf” jamoasida. Chunki ular 27 ta uchrashuvda g‘olib bo‘lgan. “Andijon”ning 6 ta bellashuvda qo‘li baland kelgan. 9 ta uchrashuvda g‘olib aniqlanmagan. To‘plar nisbatiga kelsak, tabiiyki, ko‘proq g‘alaba qozongan “Nasaf” shunga yarasha gol urgan - 94 ta gol. Andijonliklar raqib darvozasiga 48 ta to‘p kiritgan.

Mazkur klublar oxirgi marta 2021 yili to‘qnash kelishgan. “Nasaf” o‘z uyida 2:0 hisobida g‘alaba qozongan bo‘lsa, “Andijon” o‘z maydonida 1:1 hisobida durang o‘ynagan. "Burgutlar" “Nasaf”ni oxirgi bor 2019 yilgi mavsumda mag‘lub etgan. O‘shanda Andijondagi bahsda 3:1 hisobida g‘alaba qozongan.  

Statistikaga qaraydigan bo‘lsak, “Andijon” Qarshida oxirgi bor 2007 yilda ochko bilan qaytgan. O‘shanda.”Nasaf” maydonidagi uchrashuvda jangovar durang qayd etilgan – 4:4. Shuningdek, 1999 yilda “Andijon” safarda ushbu raqibi ustidan 2:1 hisobida g‘alaba qozongan.

Eslatib o‘tamiz, "Nasaf" - "Andijon" ishtirokidagi o‘yin 4 mart kuni Qarshidagi "Markaziy" stadionda soat 16:30 da boshlanadi.

“Andijon” matbuot xizmati.