Londonning "Arsenal" jamoasi hujumga qo‘shimcha kuch izlashda davom etmoqda. Insayder Kristian Falk xabariga ko‘ra, "kanonirlar" Leverkuzenning "Bayer" klubi vingeri Mussa Diabi bilan muzokara olib bormoqda.
Eslatib o‘tamiz, fransiyalik futbolchi to‘rtinchi mavsumni "dorichilar" safida o‘tkazmoqda va shu vaqt ichida u Bundesliganing eng yaxshi vingerlaridan biriga aylandi. Potensial transfer summasi "Arsenal"ga 80 million yevroga tushishi mumkin.
23 yoshli Diabi joriy mavsumda 8 ta gol urdi va 4 ta golli uzatmani amalga oshirdi. Avvalroq, Fransiyaning "PSJ" klubi ham o‘z tarbiyalanuvchisini ortga qaytarishga qiziqayotgani haqida xabarlar tarqalgan edi.
