20 yoshli futbolchilar o‘rtasidagi Osiyo kubogi chorak finalidan o‘rin olgan O‘zbekiston va Avstraliya terma jamoalari o‘rtasida deyarli 3 soat davomi etgan o‘yin hozirgina yakuniga yetdi.

Birinchi bo‘limda jamoalar tengma-teng o‘yin namoyish etishdi va hisob ochilmadi.

Ikkinchi bo‘limda vaziyat yaratish bo‘yicha ustunlik o‘zbekistonliklar tomonida bo‘lsa-da, "kengurular" 77-daqiqada hisobni ochishdi. Vakillarimiz esa tezkor javob qaytarishdi. Oradan 2 daqiqa o‘tib Abdurahmatov tomonidan yo‘llangan zarba natijasida to‘p ustunga tegib, to‘rga borib tushdi.

Qo‘shimcha bo‘limlar ham har ikki jamoa uchun og‘ir o‘tdi, futbolchilar katta kuch yo‘qotishdi. Hisob boshqa o‘zgarmagach, navbat penaltilar seriyasiga keldi.

11 metrli jarima zarbasini Avstraliya boshlab berdi. Har ikki jamoaning dastlabki 4 futbolchisi penaltini aniq bajardi. Raqibning beshinchi a’zosi tomonidan yo‘llangan zarba natijasida to‘p to‘singa tegib qaytdi. Hal qiluvchi zarbani Umarali Rahmonaliyev o‘z zimmasiga oldi va raqib darvozabonini osonlik bilan dog‘da qoldirdi. Penaltilar seriyasida — 5:4.

Shu tariqa, O‘zbekiston yoshlar terma jamoasi OCH yarim finaliga chiqish bilan birga may oyida Indoneziyada o‘tadigan Jahon chempionati yo‘llanmasini ham qo‘lga kiritdi!

U-20 Osiyo kubogi, chorak final bahsi
11 mart, shanba. soat 19:00
O‘ZBEKISTON U20 — AVSTRALIYA U20 - 1:1. Penaltilar seriyasi — 5:4
Gollar: Zafarmurod Abdurahmatov (80) — Gabriyel Popovich (77)