"Humo" xokkey klubi Qozog‘iston chempionati pley-off bosqichidan o‘rin olgan yarim finalning to‘rtinchi uchrashuvini o‘tkazdi. Jamoamiz bugun ham Atirau shahrida "Beybaris" klubiga qarshi muz ustiga chiqdi.

Kutilmaganda, muxlislar birinchi bo‘limning o‘zida 4 ta gol guvohiga aylanishdi. Bahsning 4-daqiqasidayoq Rextin "Humo"ni oldinga olib chiqqan bo‘lsa, mezbonlar 16-daqiqada muvozanatni tiklashdi.

Oradan ko‘p o‘tmasdan Shingareev toshkentliklarni yana oldinga olib chiqdi. Taym so‘ngida hakamlar vaziyat videotakrorini tomosha qilib, "Beybaris" gol urganini e’tirof etishdi.

Kechagi o‘yin g‘alaba shaybasini kiritgan Sinyavskiy, bu safar jamoamizning uchinchi goliga mualliflik qildi. Ikkinchi bo‘limning 27-daqiqasida uning zarbasidan keyin shayba darvozaga kirdi. "Humo" o‘yin oxirigacha mazkur hisobni ushlab qoldi va seriyadagi hisobni 3:1 ga yetkazdi.

Yana bir g‘alaba jamoamizni finalga olib chiqadi. Jamoalar o‘rtasidagi keyingi uchrashuv 21 mart kuni Toshkentda bo‘lib o‘tadi.

Xokkey. Qozog‘iston chempionati. Yarim final, 4-o‘yin
"BEYBARIS" - "HUMO" - 2:3 (2:2, 0:1, 0:0)
Gollar:
0:1 - 03:30 - Rextin (Sulimov, Dorofeev)
1:1 - 15:38 - Mixaylov (Ershov, Rasulov)
1:2 - 17:27 - Shingareev (Dorofeev, Rextin)
2:2 - 18:47 - Markelov (Kolesnikov, Volgin)
2:3 - 26:39 - Sinyavskiy (Fishchenko, Shurakov)