Antonio Kontening "Tottenxem"dagi taqdiri so‘roq ostida qolgan. OAVlar tinmay Konte bilan bog‘liq vaziyat haqida gapirmoqda. So‘nggi xabarlarga ko‘ra, Konte kelayotgan soatlar ichida iste’foga chiqariladi. Vaziyatning bunday keskinlashib ketishiga asosiy sabab italiyalik mutaxassisning "Sautgempton"ga qarshi bahsdan keyin shogirdlari va rahbariyat haqida bildirgan keskin tanqidiy fikrlari edi. 53 yoshli murabbiy klub ichidagi muhitga "qabul qilib bo‘lmas" deb baho bergandi.
"Shporlar" xalqaro tanaffuslar paytida o‘yin o‘tkazmaydi. 3 aprelga qadar klubdagilar dam oladi. Ammo Kontening bu davr ichida jamoada qolishi so‘roq ostiga olinmoqda. Quyida Antonio Kontening o‘rnini egallashi mumkin bo‘lgan bir nechta murabbiylar nomlari keltiriladi.
Maurisio Pochettino
Pochettino London jamoasini boshqarish uchun eng jiddiy nomzoddir. Argentinalik mutaxassis 2019 yilda jamoani YECHL finaliga olib chiqqan edi. Ammo o‘sha voqeadan olti oy o‘tib, ishdan olingan. 55 yoshli murabbiy o‘tgan iyul oyidan beri ishsiz yuribdi. U oxirgi marta "PSJ"da faoliyat olib borgan.
Marko Silva
O‘tgan haftadan beri ro‘znomalar oldi sahifasida "Tottenxem"ning keyingi murabbiyi bo‘lish uchun Marko Silva nomi ham yangray boshladi. 45 yoshli mutaxassis o‘tgan yili "Fulxem"ni APLga qaytardi. Hozir uning jamoasi yevrokuboklar uchun kurash olib bora boshladi. Silva ilgari "Xall Siti", "Uotford", "Everton" kabi jamoalarda ishlagan. Portugaliyalikning keyingi manzili "Tottenxem" bo‘lishini inkor etib bo‘lmaydi.
Luis Enrike
Ispaniya terma jamoasining sobiq ustozi Qatardagi jahon chempionatidan beri ishsiz yuribdi. Bunga sabab "qizil furiya"ning nimchorak finalda Marokashga imkoniyatni boy bergani edi. Enrike "Barselona"dagi sermahsul mehnati bilan eslanadi. U YECHL va ikkita Ispaniya chempionligini katalon klubiga taqdim etgandi. Agarda Luis Enrikega taklif berilsa, u yana klublar futboliga qaytishi mumkin.
Tomas Tuxel
Nemis mutaxassisi "Chelsi"ni o‘tgan yilning sentyabrida, kutilmagan vaziyatda tark etgandi. "Tottenxem" esa sobiq "Chelsi" murabbiylarini ishga olish bo‘yicha ustasi farang. Misol tariqasida Mourinyo va Konteni aytish mumkin. Ammo bu variantlar ish bermagan. Balki uchinchisidan foyda kelar. Buni bilish uchun Tuxel Angliyaga qaytishi kerak. U 2021 yilda "aristokratlar"ni YECHL g‘olibiga aylantirgandi.
Zayniddin Zidan
Zidan oldinroq "Chelsi" va "MYU" keladi degan mish-mishlarga sabab bo‘lgandi. Ammo afsonaviy sobiq futbolchi ingliz tili bilan bog‘liq muammo sababli "MYU"ga kelmagani aytiladi. Zidan uchun hozir Angliyada yana bir variant paydo bo‘ldi. Aytish kerakki, uning ulkan tajribasi "Tottenxem"ga asqotishi mumkin. U "Real"ni 3 marta YECHL bosh sovriniga erishtirgandi.
ISMATOV J.
