UYEFA Yevroparlament deputatlarining Belarus terma jamoasini rasmiy turnirlardan chetlashtirish haqidagi chaqirig‘iga javob qaytardi. Tashkilot prezidenti Aleksandr Cheferin parlament a’zolariga yo‘llagan maktubida bu masalani navbatdagi ijroiya qo‘mitasida muhokama qilishga va’da bergan, deb xabar beradi Germaniyaning Sportschau sayti.
"UYEFA ijroiya qo‘mitamizning bo‘lajak yig‘ilishida Belarusdagi vaziyatni muhokama qilmoqchimiz. UYEFA sizning murojaatingizda aytib o‘tgan tashvishli voqealarni diqqat bilan kuzatib bormoqda", - deyiladi Cheferinning 2023 yil 24 martdagi va Yevroparlamentning 100 nafar a’zosiga yuborilgan maktubida.
Bu maktub deputatlarning UYEFAga Ukrainadagi voqealar tufayli Rossiya, shuningdek, Belorussiya termalarini safdan chiqarish to‘g‘risidagi so‘roviga javob bo‘ldi. UYEFA Ijroiya qo‘mitasining navbatdagi yig‘ilishi 4 aprel kuni Lissabonda bo‘lib o‘tishi rejalashtirilgan. Ertasi kuni Portugaliyada UYEFA Kongressi ham bo‘lib o‘tadi, unda Cheferin uchinchi va oxirgi muddatga muqobilliksiz qayta saylanadi.
