УЕФА Европарламент депутатларининг Беларус терма жамоасини расмий турнирлардан четлаштириш ҳақидаги чақириғига жавоб қайтарди. Ташкилот президенти Александр Чеферин парламент аъзоларига йўллаган мактубида бу масалани навбатдаги ижроия қўмитасида муҳокама қилишга ваъда берган, деб хабар беради Германиянинг Sportschau сайти.
"УЕФА ижроия қўмитамизнинг бўлажак йиғилишида Беларусдаги вазиятни муҳокама қилмоқчимиз. УЕФА сизнинг мурожаатингизда айтиб ўтган ташвишли воқеаларни диққат билан кузатиб бормоқда", - дейилади Чефериннинг 2023 йил 24 мартдаги ва Европарламентнинг 100 нафар аъзосига юборилган мактубида.
Бу мактуб депутатларнинг УЕФАга Украинадаги воқеалар туфайли Россия, шунингдек, Белоруссия термаларини сафдан чиқариш тўғрисидаги сўровига жавоб бўлди. УЕФА Ижроия қўмитасининг навбатдаги йиғилиши 4 апрел куни Лиссабонда бўлиб ўтиши режалаштирилган. Эртаси куни Португалияда УЕФА Конгресси ҳам бўлиб ўтади, унда Чеферин учинчи ва охирги муддатга муқобилликсиз қайта сайланади.
