“Andijon” chempionatning navbatdagi o‘yiniga Dukentda tayyorlanayotganini bilasiz.

Oldinda 3 aprel kuni “Olimpik” jamoasiga qarshi uchrashuv kutib turibdi. G‘alabani xohlayotgan klub a’zolari bor e’tiborini mazkur bellashuvga qaratgan.

Serbiyalik legioner Vladimir Bubanya esa ortda qolgan bahslar va oldinda turgan o‘yin to‘g‘risidagi fikrlari bilan o‘rtoqlashdi.

— Ortda qolgan 3 ta o‘yin xususida nimalarni aytgan bo‘lardingiz?
— Chempionatni yaxshi boshlagan holda safarda “Nasaf”ni mag‘lubiyatga uchratib keldik. Keyin “Surxon”ga omadsiz tarzda yutqazib qo‘ydik. O‘shanda Mamatkazinning haqqoniy golini asossiz ravishda bekor qilishdi. Oxirgi o‘yinni esa ko‘ngildagidek o‘tkaza olmadik.

— Navbatdagi turda “Andijon” “Olimpik” jamoasi bilan bellashadi. Raqib haqida fikringiz qanday?
— O‘ylaymanki, “Olimpik” chempionatdagi eng yaxshi futbolni namoyish etadigan klublardan biridir. Aytish kerakki, “Olimpik” yosh jamoa, ammo tarkibdagi futbolchilar anchadan beri birga to‘p surishayotgani bois o‘yini shakllanib ulgurgan. O‘z-o‘zidan mazkur raqibga qarshi bellashuvga jiddiy ravishda tayyorgarlik ko‘rib, bir necha kundan beri Dukentda shug‘ullanyapmiz. Bizning o‘z rejamiz va maqsadimiz bor.

“Andijon” matbuot xizmati.