“Андижон” чемпионатнинг навбатдаги ўйинига Дукентда тайёрланаётганини биласиз.

Олдинда 3 апрель куни “Олимпик” жамоасига қарши учрашув кутиб турибди. Ғалабани хоҳлаётган клуб аъзолари бор эътиборини мазкур беллашувга қаратган.

Сербиялик легионер Владимир Бубанья эса ортда қолган баҳслар ва олдинда турган ўйин тўғрисидаги фикрлари билан ўртоқлашди.

— Ортда қолган 3 та ўйин хусусида нималарни айтган бўлардингиз?
— Чемпионатни яхши бошлаган ҳолда сафарда “Насаф”ни мағлубиятга учратиб келдик. Кейин “Сурхон”га омадсиз тарзда ютқазиб қўйдик. Ўшанда Маматказиннинг ҳаққоний голини асоссиз равишда бекор қилишди. Охирги ўйинни эса кўнгилдагидек ўтказа олмадик.

— Навбатдаги турда “Андижон” “Олимпик” жамоаси билан беллашади. Рақиб ҳақида фикрингиз қандай?
— Ўйлайманки, “Олимпик” чемпионатдаги энг яхши футболни намойиш этадиган клублардан биридир. Айтиш керакки, “Олимпик” ёш жамоа, аммо таркибдаги футболчилар анчадан бери бирга тўп суришаётгани боис ўйини шаклланиб улгурган. Ўз-ўзидан мазкур рақибга қарши беллашувга жиддий равишда тайёргарлик кўриб, бир неча кундан бери Дукентда шуғулланяпмиз. Бизнинг ўз режамиз ва мақсадимиз бор.

“Андижон” матбуот хизмати.