O‘zbekiston Superligasi 4-turidan o‘rin olgan “Navbahor” – “So‘g‘diyona” jamoalari o‘rtasidagi uchrashuv arafasida “lochinlar”ning 31 yoshli tajribali hujumchisi Temurxo‘ja Abduxoliqov bo‘lajak o‘yin haqidagi fikrlari bilan o‘rtoqlashdi.

- So‘zim avvalida barcha hamyurtlarimizni shu kunlarda yurtimizda davom etayotgan muqaddas Ramazon oyi bilan tabriklayman. Mazkur oyda bajarayotgan barcha amallari, ibodatlarini Alloh o‘z dargohida qabul qilsin, ilohim!

Bo‘lajak o‘yin borasida to‘xtaladigan bo‘lsam, garchi “So‘g‘diyona” turnir jadvalining so‘nggi pog‘onasidan joy olib turgan bo‘lsada, Superligada kuchsiz jamoa yo‘qligi, barcha jamoalarning kuchi deyarli teng ekanligi, bu yil oson o‘yinlar bo‘lmasligini joriy mavsumning ilk tur bahslari isbotladi.

Shu bois, har bir raqibga hurmat bilan qarash lozim. “So‘g‘diyona”ga qarshi kechadigan bahs keskin va shiddatli kurashlar ostida o‘tishi aniq.

Boisi, Namanganda har qanday jamoa “Navbahor”ga munosib qarshilik ko‘rsatishga intiladi.

Biz – futbolchilar ham jizzaxliklar bilan bo‘ladigan o‘yinda g‘alaba qozonib, muxlislarga quvonch ulashishga harakat qilamiz hamda buni amalga oshirish uchun barcha imkoniyatimizni ishga solamiz.

Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.

Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek, “Navbahor” PFK rahbariyati, jumladan, klub vise-prezidenti Otabek Arifovich Samatovga jamoamiz nomidan o‘z minnatdorchiligimni bildiraman.

Jamoamiz joriy mavsumda o‘zi qatnashadigan barcha musobaqalarda zafar quchishni maqsad qilgan.

Buni amalga oshirish uchun biz – futbolchilar qo‘ldan kelganicha harakat qilamiz.