Angliyada Markusning g‘ashiga tegishni xush ko‘rishadi. Goh onasiga o‘ta qimmatbaho uyni sovg‘a qilganini ko‘ra olmaganlar, goh pandemiya davrida nochorlarga yordam berishni lozim topmagan davlat arboblarini tanqid qilgani uchun Reshfordni ta’qib qila boshlagan ayrim fanatlar...
Hatto uning o‘yini ham yaqingacha ko‘pchilikning tilini qichitib kelayotgandi. Endi Markus gollardan kolleksiya yarata boshlagach, futbolga oid noxushliklar kamaydi. Endi g‘animlar Reshfordni ko‘chirmachi, gol nishonlash ishoralari «o‘g‘risi» sifatida ayblaydiganlar paydo bo‘ldi. Erik Ten Xag shogirdining goldan keyin barmog‘ida chakkasini ko‘rsatishini quyidagicha izohlagandi: «Nima qilayotganimni nazorat qilyapman».
«Vulverxempton» o‘yinchisi Nevesh bu ishoradan foydalanishga izn so‘radi, Joshua Kimmix esa anchadan beri o‘z gollarini shu tarzda nishonlab kelmoqda. Germaniyalik muxlislar nemis bu usulni Markusdan olgan, degan fikrda edilar. Reshfordning o‘zi Tchuameni JCHda Angliya terma jamoasi darvozasiga urgan golini shu usulda bayram qilganiga guvoh bo‘lgandi. Orelyen o‘z navbatida bolalikdagi «kumiri», «Lion»ning sobiq hujumchisi Lisandro Lopesni yodga oldi, «Arsenal» ishqibozlari bir paytlar buyuk Lord Bendtner shu usuldan foydalanganligini e’tirof etishdi. Shuningdek, bu usulni britaniyalik aktyor ham namoyish etgan bo‘lsada, aynan Markus unga ikkinchi hayotni tuhfa etdi.
Ronaldu pichingga javob qaytardi
Saudiya Arabistonida Krishtianuni doimo Messiga qiyoslaydilar. Lekin bolakaylarning aksariyati gollarini sakrash va «Si-i-i-i-u» deya qichqirgan holda nishonlashadi. Aynan Ronaldu ishorasidek. Avvallari portugaliyalik to‘purar «Ha» iborasini ispan tilida aytardi. Endi yangi ishora paydo bo‘ldi. «MYU»dagi jamoadoshlari tavsiyasi bilan qo‘llarini ko‘ksiga qo‘yishga odatlandi. Olimlar Ronalduning tiklanib olishiga yordam berishmoqda. U bilan ishlayotgan mutaxassis har sutkada ikki mahal - kunduzi 1,5 soat, tunda 6 soat uxlashni maslahat berdi. Krishtianu esa «MYU»dagi jamoadoshlariga ko‘pincha chalqancha yotgan va qo‘llarini chalishtirgan holda uyg‘onishi haqida gapirgandi. Shundan keyin «MYU»da «murda» xususida hazil-mutoyibalar paydo bo‘lgandi.
Pedri yorqin kelajakni ko‘zlamoqda
Ko‘pchilik futbolchilar vaqtlarini pristavkalar qarshisida o‘tkazadilar. Antuan Grizmann o‘z gollarini sevimli o‘yinidagi uslubda nishonlaganiga guvoh bo‘lganmiz. Lekin «Tik-Tok» avlodining yoshlari orasida yerga yaqinroq yuradiganlari ham yo‘q emas. Pedri o‘z gollaridan birini sochsiz boshini ko‘rsatish bilan nishonladi. Futbolchi shu tariqa sochlari barvaqt to‘kila boshlagan amakivachchasi Abraxamni eslatib o‘tgandi. Shuningdek, hozirda juda mashhur bo‘lib ketgan uslubi «binokl» ham bor. «Barselona» o‘yinchisining mazkur usulini azaliy raqib, ya’ni, «Real» muxlislari o‘ziga xos tarzda baholashdi: go‘yoki, Pedrining nazdida, «Real» turnir jadvalida «Barsa»dan shu qadar ortda qolib ketganki, uni binoklsiz ilg‘ab olishning iloji yo‘q. Biroq bu - ashaddiy raqib fanatlarining taxminlari. Aslida, ishoraning mazmuni o‘ta jo‘n: Pedri gollarni otasi Fernandoga bag‘ishlamoqda. Senyor Gonsales - ko‘zoynak bilan yuradigan oqsoch otaxon. Futbolchi aynan ko‘zoynakka ishora qilgan bo‘lsada, boshqa kasbdoshlariga bu usul yoqib qoldi.
O‘zgalarga ilhom ulashgan Xoland
O‘ta qisqa vaqt ichida mashhurlikka erishgan sermahsul snayper tez orada yanada yuksakroq cho‘qqini zabt etsa, ajablanmaymiz. Ayniqsa, «Manchester Siti» bilan YECHLda g‘olib chiqsa. Uchrashuvlardan birida xet-trikka erishgan Xolandni zaxiraga olgan Gvardiola hazillashib shunday degandi: «Shu ketishda Erling Messining rekordini yiqitishidan xavotirdaman». Mavjud salohiyati bilan norvegiyalik mergan argentinalik faxriy kasbdoshining oyog‘i yetmagan cho‘qqiga ko‘tarila oladi. Hozircha, u o‘z oyoqlaridan faqat urgan gollarini nishonlashda foydalanmoqda. Xoland stress holatlardan nafratlanadi, asabiylashmaslikka intiladi. Lekin ba’zan noxush vaziyatlarga duch keladi. Bir paytlar «PSJ» «Borussiya Dortmund»ni YECHLdan chiqarib yuborgan o‘yindan keyin parijlik futbolchilar norvegiyalik yosh iqtidorni kalaka qilganliklarini unutganimiz yo‘q. Qani ozgina sabr qilaylikchi, g‘oliblikka kim avvalroq erisharkin. Xolandning goldan keyingi oyoq chalishtirishi boshqa futbolchilarda hozircha, ko‘rinmadi. Lekin amerikacha futbol o‘yinchisi Lazarda aynan shu usulni qo‘llaydi.
Mbappe va Saka afsonani sharaflashdi
Kilian o‘z gollarini Anri usulida bayram qiladi, Saka ham afsonani sharaflashni xush ko‘radi - burchak bayroqchasi tomon chopadi. Vaholanki, Tyerrining qiziqarliroq o‘zgacha ishoralari ko‘p. O‘zining mashhur qo‘l qovushtirish usulini esa, Kilian ukasi Itandan qarzga olgan. U ham «PSJ» a’zosi, bolalik paytida futbol simulyatoridagi o‘yinda g‘alabalarini shu tarzda nishonlardi.
Gollarga o‘ziga xos tarzda reaksiya bildirish o‘z tarixiga va ko‘pincha qandaydir ma’noga ega. Masalan, Lui van Gal o‘z vaqtida Vegxorstni JCHda argentinaliklarga qarshi «qayragandi». Niderlandiya darvozasini ishg‘ol etgan Messi bunga javoban qachonlardir Rikelme Lui bilan kelisha olmay qolganini esladi va golni quloqlarini kafti bilan berkitib nishonlagandi. Ya’ni, o‘zini dahshatli shovqindan himoya qilgandi. Uchrashuv tugagach, Messining dahshatli shovqini butun dunyoni zabt etdi. Argentina terma jamoasi futbolchilari aynan sardor yuzidagi qat’iyatdan keyin g‘alabaga amin bo‘lganliklarini aytishgandi. Bebetoning allasi, Zyubaning salyuti kabi ishoralar tobora ommalashib bormoqda. Xursandchilikni o‘ziga xos tarzda namoyish etish - futbol shousining bir qismi. Har bir futbolchi uni o‘zicha ijro etadi.
Sodiq SOBIR tayyorladi
