Huquqlari “Krasnodar”ga tegishli bo‘lgan yarim himoyachi Eduard Spersyan faoliyatini Yevropada davom ettirishi mumkin. 22 yoshli futbolchiga Germaniya Bundesligasining bir qancha klublari qiziqish bildirmoqda.
Metaratings.ru nashri xabariga ko‘ra, Spersyanni “Borussiya” (M), “Bayer” va “Frayburg” klublari o‘z safiga qo‘shib olmoqchi. Shuningdek, Eduardga A Seriyadan qiziqishlar bor. Yarim himoyachining xizmatlariga Milanning “Inter” klubi qiziqmoqda.
Futbolchining o‘zi ham kelasi yozda Yevropaning top-5 chempionatlaridagi klublardan biriga o‘tishga qaror qilgan.
Rossiya Premyer-ligasining joriy mavsumida Spersyan 21 ta o‘yin o‘tkazdi. Yarim himoyachi 9 ta gol (3 tasi penaltidan) va 8 ta golli uzatmani amalga oshirdi.
