"Paxtakor"ga qarshi Superliganing 5-tur o‘yinidan (1:3) so‘ng "Qizilqum" ustozi Asror Aliqulov matbuot anjumanida ishtirok etdi.

— Raqibga qarshi bosim uyushtirish uslubini tanlagandik, ammo bosim natijasida gol o‘tkazib yubordik. Maydonda harakatlanishda ham sustkashlikka yo‘l qo‘ydik. Raqib bizdan tezroq fikrlagan holda harakat qildi. O‘yin davomida himoyadan qarshi hujumga o‘tishni maqsad qilgandik. Ikkinchi bo‘limda 10 kishi bo‘lib qoldik, bu ham o‘z ta’srini o‘tkazdi. Shunga qaramasdan, bosim natijasida gol urdik.

— "Qizilqum"ning "Paxtakor"ga qarshi o‘yinlardagi muvaffaqiyatsiz o‘yinlariga sabab nima?
— Jamoa hali yangi. Aksariyat jamoada qolgan futbolchilar o‘tgan yil zaxirada qolgan. Bugun xatolarimiz evaziga gol o‘tkazib yubordik. Hali bir jamoa bo‘lib shakllanishimiz uchun vaqt kerak. Lekin Superliga kutib turmaydi. Hali ko‘p ishlar olib borishimiz kerak.

— Hujumchilardan ko‘nglingiz to‘lyaptimi? Jamoa kutilganidan kam gol urmoqda?
— Mavsum avvalida Xolto‘rayev imkoniyatlarimizga mos kelgani uchun tarkibga jalb qilgandik. Mbaomaning jamoaga kirishib ketishi ham qiyin bo‘lmoqda. Bugun u gol urdi, keyingi o‘yinlarda muvaffaqiyat kutib qolamiz. Hujumlarimiz Kenjaboyev va Xolto‘rayev asosida tashkil etilmoqda. Bizda ikki qanot birday ishlamayapti. Jamoaviy o‘yin jihatdan oqsayapmiz. Bir maromda o‘yin olib borolmayapmiz. Markazda ham muammolar yetarlicha. Hali ko‘p ishlar olib berishimiz kerak.