O‘zbekiston Superligasi 6-turidan o‘rin olgan “Navbahor” – “Andijon” jamoalari o‘rtasidagi “vodiy derbisi” arafasida “lochinlar”ning bugun 30 yoshini nishonlayotgan tajribali hujumchisi Shohruz Norxonov bo‘lajak o‘yin haqidagi fikrlari bilan o‘rtoqlashdi.

"So‘zim avvalida barcha hamyurtlarimizni shu kunlarda yurtimizda davom etayotgan muqaddas Ramazon oyi bilan tabriklayman. Mazkur oyda bajarayotgan barcha amallari, ibodatlarini Alloh o‘z dargohida qabul qilsin, ilohim!

Bo‘lajak o‘yin borasida to‘xtaladigan bo‘lsam, ushbu bahs “vodiy derbisi” sanaladi va derbi bahslari doimo shiddatli, keskin kurashlar ostida va tomoshabop kechadi.

Mazkur uchrashuv ham bundan mustasno bo‘lmaydi, albatta hamda Xudo xohlasa, ilk marta “vodiy derbisi”da bevosita ishtirok etish imkoniyatiga ega bo‘lib turibman.

Joriy mavsum bahslari Superligada barcha jamoalarning kuchi deyarli teng ekanligi, bu yil oson o‘yinlar bo‘lmasligini isbotlamoqda.

Bo‘lajak raqibimiz “Andijon” ham derbi maqomiga ega uchrashuvda jamoamizga munosib qarshilik ko‘rsatishga intiladi.

O‘tgan turda OKMKga qarshi kechgan o‘yinda imkoniyatni boy berib, muxlislarni ranjitib qo‘ydik. Shu bois, andijonliklar bilan bo‘ladigan bellashuvda g‘alaba qozonib, muxlislarga quvonch ulashishga harakat qilamiz hamda buni amalga oshirish uchun barcha imkoniyatimizni ishga solamiz.

Ishqibozlardan esa jamoamizni bevosita stadionda munosib tarzda qo‘llab-quvvatlab, g‘alabamizga madadkor bo‘lishlarini so‘rab qolaman.

Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek, “Navbahor” PFK rahbariyati, jumladan, klub vise-prezidenti Otabek Arifovich Samatovga jamoamiz nomidan o‘z minnatdorchiligimni bildiraman.

Jamoamiz joriy mavsumda o‘zi qatnashadigan barcha musobaqalarda zafar quchishni maqsad qilgan.

Buni amalga oshirish uchun biz – futbolchilar qo‘ldan kelganicha harakat qilamiz" - dedi Norxonov.